Prishtinë, 12 shkurt - Ambasadori amerikan në Kosovë, Greg Delawie ka deklaruar se ambasada amerikane nuk do të bisedojë me partitë politike që nuk refuzojnë dhunën e as me zyrtarët publik që akuzohen për shpërdorim të detyrës.

\"Pjesëtarët e ambasadës sime janë të gatshëm të takohen me të gjitha partitë politike që heqin dorë nga dhuna. Ne mbajmë kontakte me partitë politike që nuk përfshihen drejtpërdrejt në dhunë. Ne i mbështesim partitë politike demokratike. Nuk jemi të interesuar të bisedojmë me ata që ushtrojnë dhunë\", tha Delawie.

Në një intervistë për Zërin e Amerikës , ai tha se zgjedhjet nuk duhet të jenë rezultat i dhunës por i kalendarit kushtetues.

Ambasadori Delawie, duke folur edhe për korrupsionin tha se nuk do të takojë as zyrtarët që janë të akuzuar për shpërdorim detyre.

\"Në ambasadën time kemi vendosur se nuk do t’i takojmë zyrtarët publik që akuzohen për shpërdorim të detyrës. Kjo sigurisht e bën jetën më të vështirë. Janë disa kryetarë komunash të Kosovë, të cilët nuk i kam takuar. Ne mendojmë se është shumë me rëndësi që të tërheqim vijën në rërë dhe iu kundërvihemi atyre që vjedhin nga taksapaguesit e Kosovës\", ka theksuar Delawie.

Ai ka thënë se korrupsioni është çështje kryesore në mendjen e shumicës së qytetarëve të Kosovës dhe më me dëshirë do ta shihja klasën politike dhe qytetarët e Kosovës duke folur për çështjet e rëndësishme si korrupsioni, sesa për kriza politike të sajuara që i përmenda më herët.