Prishtinë, 1 gusht - Hashim Thaçi, Enver Hoxhaj, Hajredin Kuçi, Edita Tahiri, Memli Krasniqi, Agim Çeku e Besim Beqaj janë disa nga emrat të cilët janë certifikuar si deputetë në Parlamentin e Kosovës dhe të cilët vazhdojnë t’i ushtrojnë pozitat në Qeveri.

Këtë e bëjnë pavarësisht faktit se me nenin 82 të Kushtetutës së Kosovës, deputetëve u ndalohet të ushtrojnë ndonjë funksion tjetër në Ekzekutiv.

“Deputeti i Kuvendit të Kosovës nuk mund të mbajë ndonjë post ekzekutiv në administratën publike ose në ndonjë ndërmarrje në pronësi publike, dhe as të ushtrojë ndonjë funksion tjetër ekzekutiv, sikurse është përcaktuar me ligj”, thuhet në nenin 82 të Kushtetutës se Kosovës.

Sidoqoftë, ministri i Drejtësisë Hajredin Kuçi, në një prononcim për gazetën ka thënë se ketë muaj ka marrë vetëm rrogën e ministrit e cila, sipas tij, është më e ulët se ajo e deputetit.

“Sigurisht se do ta marr vetëm njërën rrogë. Këtë muaj kam marrë vetëm rrogën e ministrit e cila është më e ulët se ajo e deputetit”, ka thënë Kuçi. Edhe ministri i Punëve të Jashtme, Enver Hoxhaj, ka vepruar njëjtë.

/Tribuna/