USAID ka përkrahur shumë Kosovën
Prishtinë, 19 korrik - Ministrja e Tregtisë dhe Industrisë, Hykmete Bajrami, priti në takim, drejtorin e misionit të USAID-it në Kosovë, James Hope.
Ministrja Bajrami e informoi z. Hope me punën që po bën Ministria e Tregtisë dhe Industrisë në përmirësimin e shërbimeve për bizneset dhe krijimit të kushteve më të mira për afarizëm dhe fuqizim të ndërmarrjeve.
Ajo foli për projekte të ndryshme të cilat kanë për qëllim implementimin e suksesshëm të Marrëveshjes për Stabilizim Asociim, fuqizimin e ndërmarrjeve, zhvillimin e turizmit, etj.
Ajo falënderoi USAID-in për mbështetje të pakursyer që po i ofron Qeverisë së vendit në implementimin e një sërë projektesh të rëndësishme në të mirë të rritjes ekonomike të vendit tonë. Nga ana tjetër, z. Hope, u shpreh i gatshëm se Qeveria Amerikane, përmes USAID-it do të vazhdojë të mbështesë Kosovën në rrugën e saj të konsolidimit ekonomik, krijimit të një ambienti më të mirë për të bërit biznes, fuqizimit të ndërmarrjeve, promovimit të eksportit, zhvillimit të turizmit etj.