Gjenevë, 26 gusht - Virusi vdekjeprurës Ebola që ka përfshirë vendet e Afrikës Perëndimore ka prekur një numër të lartë mjekësh.

Sipas raportit të vlerësimit mbi këtë epidemi, lëshuar të hënën nga Organizata Botërore e Shëndetësisë ka rezultuar se deri tani, 240 anëtarë të ekipeve mjekësore janë prekur me këtë virus, gjysma e të cilëve kanë humbur jetën. OBSH-ja konfirmon se numri i mjekëve të prekur me Ebola ka shënuar rekord.

Pak muaj më parë, OBSH-ja dërgoi 400 specialistë të shëndetit në vendet e Afrikës Perëndimore, të cilët kishin eksperienca të shumta në përballimin e epidemive të ngjashme.

Ata bashkëpunuan me mjekët lokalë për të kontrolluar dhe parandaluar virusin, i cili u shndërrua në kërcënim edhe për vetë mjekët.