Prishtinë, 22 nëntor - Vlefshmëria e vendimit të Lidhjes Demokratike të Kosovës, për t’u bashkuar me PDK-në për të formuar qeverinë e re, mund të vihet në pikëpyetje nga anëtarësia e këtij subjekti. Kjo pasi që janë bërë 15 ditë që kur udhëheqësisë së LDK-së i ka skaduar mandati.

Zgjedhjet e fundit brenda LDK-së të mbajtura më 7 nëntor 2010, sollën në krye të partisë kryetarin e atëhershëm të Prishtinës, Isa Mustafën, i cili deri në ditën e mbajtjes së Kuvendit të VII zgjedhor të LDK-së nuk kishte bërë të ditur kandidaturën e tij.

Veprime të tilla të Mustafës, të cilësuara asokohe nga njohës të rrethanave politike si dinake, nuk përfundojnë me kaq, meqë ai pas gati gjashtë muajsh që qëndroi në bllok me AAK-Nisma e Vetëvendosje, vendosi t’i bashkohet Hashim Thaçit, për të formuar qeverinë.

Sipas njohëseve të rrethanave politike, edhe pse udhëheqësia e LDK-së po funksionon pa kredibilitet të plotë, do të ishte e vështirë që koalicioni PDK-LDK të prishej, meqë për këtë do të duhej guxim dhe vendosmëri e çeliktë nga ana e anëtarëve të LDK-së.

/Tribuna/