Mitrovicë, 17 prill - Kuvendet komunale të Leposaviqit dhe Zveçanit do të mblidhen sot në ora 17:00, për të diskutuar nëse do t’i harmonizojnë statutet e tyre me Ligjin për Vetëqeverisje Lokale të Kosovës, sot është dita e fundit e afatit ligjor për këto komuna.

Ndërsa komunat e Mitrovicës veriore dhe Zubin Potokut kanë afat deri në datën 22 prill për të vendosur.

Nëse nuk ndryshojnë statutet e tyre, këto komuna rrezikojnë shpërbërjen e kuvendeve dhe shkuarjen në zgjedhje të jashtëzakonshme.

Përveç se komunat veriore kanë shmangur simbolet dhe mbishkrimi “Republika e Kosovës”, referencë e statuteve të katër komunave veriore është Rezoluta 1244 e Këshillit të Sigurimit, Marrëveshja e Brukselit, si dhe bashkëpunimi i tyre me Serbinë.

Kryetari i Kuvendit Komunal të Zubin Potokut, Nemanja Jakshiq, ka thënë se ata nuk pranojnë simbolet e Republikës së Kosovës në dokumentet dhe vulat e tyre. Por u shpreh se fjalën kryesore e kanë delegatët.